Сонгодог бүжгийн тэнхимийн түүхээс: 1937 онд БНМАУ-ын Ардын сайд нарын зөвлөлийн ерөнхий сайд А.Амарын тушаалаар “Театрын дэргэдэх уран сайхны сургууль” байгуулагдсан. Тухайн үед анхны мэргэжилтэн багш нараар ЗХУ-аас бүжгийн багш Нонна Влидимировна Кузнецова урин авчирч ажилласан бөгөөд, дараа нь В.Я.Романовский бүжгийн сургалтын суурийг тавихад чухал үүрэг гүйцэтгэжээ.
Сонгодог бүжгийн жүжигчдийг бэлтгэх үйл хэрэг 1944 оны 9 сарын 1-нд 12 сурагчтайгаар эхэлсэн талаар анхны сонгодог бүжгийн багш Ц.Лувсанцэрэн дурссан байдаг.
1957 оноос тус сургуулийн бүжгийн сургалтанд эрс шинэчлэлт орж, ЗХУ-ын бүжгийн сургалтын дэг школа, хөтөлбөрөөр анхны сонгодог бүжгийн ангид 10-12 насны сурагчдийг элсүүлэн 7 жилийн сургалтын хөтөлбөрөөр сургаж эхэлсэн нь бүжгийн жүжигчдийн мэргэжлийн түвшинг дээшлүүлэх, сургалтын чанарыг сайжруулах чухал алхам болсон.
Бүжгийн тэнхим нь 2009 он хүртэл элсэгчдийг зөвхөн “Бүжгийн жүжигчин” мэргэжлээр төгсгөж байсан бол 2009 оноос Бүжгийн багш дасгалжуулагчийн ангийг шинээр нээж 2011 онд анхны төгсөгчдөө төгсгөснөөс хойш “Бүжгийн багш дасгалжуулагч” мэргэжлээр бакалавр, “Урлагийн боловсрол, Бүжгийн багш” чиглэлээр магистрын зэрэг олгож эхлээд байна.
Уран сайхны сургуулиас Монгол улсын Консерватор болж өнөөг хүрэхдээ, 42 удаагийн төгсөлтөөр 690-ээд мэргэжлийн бүжгийн жүжигчдийг бэлтгэн гаргаж, улс эх орныхоо хөгжилд үнэтэй хувь нэмэр оруулсаар ирсэн түүхтэй.
Сонгодог бүжгийн тэнхимийн эрхлэгчээр Х.Мөнгөнхөлөг /МУГЖ,дэд профессор/ ажиллаж Дэд профессор,хүндэт профессор,МУГЖ,МУБТА зэрэг үндсэн 8 багштайгаар сургалтын үйл ажиллагааг явуулж байна.
